مبروك مقدماً

والنبى عايز حد يقولى ازاى بس

اى حاجة بتحصل فى مصر وبيبقى قايل عليها حسنى مبارك بتحصل

بيبقى عايزها الشعب بقى مش عايزها دى حاجة تانية المهم هو قال وخلاص

والباقى بقى هما يعملوا يزوروا، يعتقلوا، يضربوا ان شاءالله يولعوا فى الشعب هو المهم الحاجة الى عايزها تتنفذ

دا الى بيحصل عالطول

حد يقولى كدة حاجة هو قال انها من مصلحة الشعب الى هو معندوش فكرة عنه ومحصلتش

انتخابات الرئاسة ولا انتخابات البرلمان ولا التعديلات الدستورية

انا بقى بيتهيئلى انه لو جى بكرة

وطلع فى خطاب للشعب وقال" اتحدث بعد دراسة واقول بعد مناقشات اننى اخترت بين امريين ان تتوقف التنمية او ان نستمر فى العبور للمستقبل ولهذا اتحدث اليوم الى الشعب اننى لن اتوقف عن دفع عجلة المستقبل ولذلك قررت ان نقوم ببيع الهرم لسداد ديون مصر طالماالشعب موجود فهناك امل"!!!!؟

وبردة ناس تطلع تهلهل وتقول اهنا معاك والكلام الى اهنا بنسمعه فى كل حديث له

بس انا بس عايز حد يقولى امتى بجد حيبقى فى شعب وفى حاكم وفى بلد اساسا

مش كله بيدور على حاجة واحدة

هو يختار، هو يقرر، هو ينفذ

اهو بكرة الاستفتاء على التعديلات وحيجوا بعديها يقولك الشعب قال اه امام كل كارهين الوطن والكلام بتاع كل مرة


وعشان كدة بقولو وبكل ثقة قبل اى حاجة مبروك على التعديلات

وعقبال الهرم

تاج تاجتنا فى تاج تجتكوا جات التجية تجتجح ملقتلهاش تجتح

طبعا دى ترجمة من اختراعى على المثل الشهير
دا بقى يا سيادة لانى كنت بقرى التاج الكبير اوووووى دا عند الاخت سمرا وقلت حتبعتهولى فى النهاية(اصلى كنت حموت وحد يبعتلى تاج ) ولما
لقيت انها ترسل التاج للقائمة باكملها و(منهم انا) قلت لا لازم يكون فى حاجة تبعتلى التاج عشان الناس متكولش وشى روحت قلتلها بعد زرف الدموع ان تبعتلى التاج بشكل مباشر كدة وهى شاكرة بعتت الكومنت دا لحفظ ماء الوجه

smraa alnil said...
محمد
انا عندي تاااااااااااج
وهتعملوا يعني هتعملوا
لانك من ضمن القايمة عندي
اجباااااااااري

ودلوقتى نبتدى التاج (قلبى حيقف من الفرحة يا جدعان)حد يجبلى كوباية ميه

هل كنت طالب شاطر فى المدرسة ؟
يعنى كنت فى الاول كدة واد مفيش منى اتنين بس دا لحد المرحلة الابتدائى بس بعد كدة ابتديت الوكسة ومستمرة ولله الحمد حتى اليوم فى الجامعة ومش عارف حتنتهى امتى

ايه كانت احب مادة و اكره مادة ليك فى المدرسة و الكلية؟
بالنسبة للمدرسة فانا كنت بحب الرياضة(الحساب) اوى اوى اوى
وكنت فاكر انى حاخترع نظريات جديدة فى الرياضة
وكنت بكره حاجة اسمها كيمياء مكونتش بفهم حاجة فيها اصلا
والمدرس يقعد يقولى انت بس عايز تتابع وانت مش عارف اى وانا اساسا مكونتش بعرف اكتب كلمة كيمياء
وكنت عالطول انساه الياء التانية

كنت عايز تتطلع ايه وأنت صغير ؟
مش عايز ضحك امنعوا الضحك
كنت عايز اطلع جيمس بوند
كنت عالطول بتفرج عليه واقعد اقول انا لما اكبر حبقى زى دا




التاج الثانى من سمرا الى جالها من عند ليندا
هذا التاج ذو طبيعة انثوية جدا ولذلك ساجاوب بمزاجى وعلى طرقتى والى مش عاجبه حضربه بالرصاص واحرمه من الميراث


دائما ما تطالب المرأة بالحصول على حريتها . فما مفهوم الحرية في قاموس المرأة؟
والله مانا عارف انا مش مراة عشان اعرف بس يعنى انا من وجهة نظرى ان كل مراة وليها منظور مختلف وكل مجموعة بتتجمع فى منظور واحد ليعملوا مجموعات كتير ومناظير كتير وبعد كدة يلخبطوهم والى يدخل السحب يكسب عربية

متى احسست بنفسك "خائنة"؟
طبعا حاعتبر الكلمة "خائن" مش "خائنة"
انا محستيش الاحساس دا قبل كدة بس انا فعلا فى مرة لو قلت لاى حد عليها حيقولى انت خاين بس انا عملت كدة لمصالحة الانسانة الى معايا اولاً ولمصلحتى ثانيا بس كان غصب عنى وبردة انا مش حاسس انى كنت خاين
محدش يسال على حاجة هو دا الى عندى

هل يمكن ان تحب المرأة رجلين في نفس الوقت؟ نقول الحب و ليس الاعجاب.؟
قلت انا مش مراة
بس بردة من وجهة نظرى المتواضعة طبعا ان فى بنات يندب فى عينهم رصاصة زى ما فى ولاد يندب فى عينهم رصاصتين
بيقولوا اى يعنى لما الواحد يحب اتنين بس انا طبعا مش مقتنع بالكلام دا خالصصصصصصصصصصصص

إذا خذلك لعديد من المرات، هل ستستمرين معه في علاقة مستقرة؟؟
طبعا "تستمرين" حتبقى تستمر عشان بس كلام الناس
والله انا اصلا حصل معايا كدة واستمريت وكنت بكدب على نفسى بس فى النهاية
زهقت وقلت طظ بقى هو انا بعمل فى نفسى كدة ليه
وعلى راى الاخت كوريا فى فيلم عسكر فى المعسكر "ياخى توكة"


ماذا ترتدين فى أول لقاء لكِ مع حبيبكِ بالوصف التفصيلى؟
بالطبع سنغير الصياغ ليصبح "رجالى" بيتهائيلى فهمتوا مش حاقعد اصلح كل شوية
والله انا فى اول لقاء دا بيختلف معايا لو جايب حاجة جديدة طبعا بالبسها
اما بقى لو الواحد فى حالة تقشف يبقى احلى واجدد حاجة بالنسبة ليا حاجة واضحة بيتهائيلى


ما هى أول فكرة ترد الى ذهنك فى اللحظات الأولى بعد دخولك "المحظور"...لا توجد خيارات للإجابة؟
هو اى المحظور اصلا
بس يعنى لو تقصدوا المحظور الى هو المحظور
يبقى سمعنى اغنية "انا مش معاهم"

سؤال بالعربية الفصحى الى العربية الفصحى، أيعقل أن تكون هيفا وهبي المرأة العربية
من المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن؟
بالطبع مش حاغير حاجة عشان انا زهقت انتوا فهمتوا ان السوال حيبقى بطريقة ذكورية خلاص
اهنا ممكن نفعل شى جميل جدا نلم من بعض ونتفق على واحد يتجوزها ويلمها فى بيته ونريح الشعب وطبعا حنعمل قرعة نزيهة وديمقراطية مفيهاش غير اتنين انا وصاحب مدونة "وجهة نظر"


إذا عجبك شاب، بتجربي تلفتيلو انتباهو، كيف؟
طبعا حيبقى السوال لو عجبتك بنت عشان الناس الى فى الطراوة تصحى شوية
اه بحاول الفت انتباها بكل الطرق المتاحة دون استفزاز طبعا
بس لو عاشت فى الدور يبقى تروح تلعب مع الفيل


إذا عجبك شاب وما بادلك الاعجاب، شو بتعملي؟
طبعا للاخوة النائمين نقول صباح الخير السؤال طبعا حيبقى لو عجبتك فتاة (مش حصحى حد تانى)
محصلتش قبل كدة ومفكرتش فيها وبيتهائيلى عمرها ما حتحصل
لانى قبل ما بفكر اعجب ببقى عارف انا مين والى بعجب بيهم مين مش اى حاجة وخلاص
ومش عايز حد يعترض اهنا مش فى محاكمة هنا


في مرشد بيقول انو البنت بترغب الشاب طالما انو بشكّل تحدي لها، شو رأيك؟
طبعا انا قلت مش حصحى حد فالى نايم يفضل نايم
الكلام دا صحيح فى حالات كتير عشان الواحد منا بيحب البنت الى بتمثل تحدى عشان يحس انه مختلف مش زى اى حد


هيفاء وهبي، شادية، وفاتن حمامة: مع من تتماهين أكثر؟ (بصراحة ومن دون مثاليات.
ترجمة يا جدعان(اى تتماهين دى)
انا حاعمل زى سمرا وحاعتبرها تمثيل يعنى
بصراحة ومن دون مثاليات حاعمل دويتو مع هيفاء ومسلسل مع شادية وفيلم مع فاتن حمامة
وبكدة نكون حزمنا السوق


انتقي شخصية رجالية معروفة تتمتع بالكاريزما (برأيك) وتكلمي عنها ؟
دا حجاوب عليه زى ماهو
الرسول (صلى الله عليه وسلم)
بالطبع الكلام عنه لن ينتهى
اكتفى ان اقول انه اعظم خلق الله

ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة
(لأن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)
تأكدي إنو صادر قدامك إيام صعبة قريبة جايي
والله ما عارف اى الكلام الكبير دا بس على العموم انا حقول على حاجة واحدة وهى الاسامى انا اساسا عايز اخلف كل خلفتى بنات
وعايز اسميهم اسامى غريبة وجديدة وفى نفس الوقت جميلة
الى عنده اسامى بالمواصفات دى يبعت على صندوق بريد الشمعدان

لماذا تنفخ المرأة في كل الزبادي كلما لسعتها الشوربة؟
مش عارف والله اصل الستات دول عليهم حاجات غريبة

هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟
"بخ"
دا بس عشان الناس الى ابتدوا يتوهوا مننا طبعا السؤال سيكون بطابع رجالى مش كدة (ارحمونى بقى كل شوية لازم اقولكم)
انا من وجهة نظرى ان فى فترة المراهقة الشاب بيبقى عايز يحب عشان يتقال عليه انه واد جامد بقى والكلام الحلمبس دا
بعد كدة طبعا بيكتشف انه كان غلط ويضرب نفسه 100 جزمة عشان الى كان بيعملوا دا

ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
يالهوىىىىىىىىى
دا كان يوم مطلعلوش شمس
دا حضرتك كنت مرة قاعد فى حالى لقيت اخت بتتصل بيا وتقولى عايزين نتعرف
طبعا انا كنت ساعتها مش فاكر اولى ثانوى باين
المهم قولتها وماله واتعرفنا واتكلمنا وقاعدنا فترة نتكلم من غير ما تشوفنى ولا اشوفها
المهم قررنا فى يوم اننا نتقابل
ومش عايز اقولك بقى على حصالى وعليى جرالى
روحت يا معلم فى الميعاد المحدد وعمال مستنى الاخت تصل
شوية ولقيت واحدة جاية عليا لابسة نفس اللون الى قالت عليه
طبعا قلت لا مستحيل دا انا اكيد غالطان
شوية ولقيتها جاية بتحوم حواليا
ومرة واحدة قلتليى انت محمد
طبعا مش عايز اقولكم انى كنت حاعيط واوطى على ايدها ابوسها واقولها والنبى سبينى اروح ومش حاعمل كدة تانى
بس فكرت فى السريع وقولتلها"لا انتى غلطانه انا مش محمد"
وخد ديلى فى سنانى وجريت وقبل ما اوصل كنت رميت الخط وكنت بفكر اروح اعمل للموبايل تطهير


لماذا تدعي اغلب النساء انهن لا يجدن الطبخ؟
عشان محدش من الرجالة يزهقهم وكل شوية يقولها اصل انا مش عارف نفسى فى اى وعايزك تعمليلى اى فتريح دماغه وتقول انها مش بتعرف ولسه بتتعلم عشان ياكل وهو ساكت


ذكرى وظروف اول قبلة؟
نونونونونونونونو"توب شكرى"

هل تقبلين بأستمرار العلاقة التي تربطك بشخص (زوج أو عشيق) في حال مات الحب بينكما؟؟
والله الحب زى النبات لو بطلتى ترويه يموت وانا مش ناوى انى ابطل اروى النبات بتاعى

هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟
طبعا عشان الى نسيوا انا بجاوب على الاسئلة بصيغة الذكور
والله فى بنات ممكن الواحد يضحى عشانهم بكل حاجة بس لما هما يبقوا كمان ممكن يضحوا باى حاجة
مش انا اضحى وتيجى بعد كدة تقولى سعيكم مشكور





التاج من عند سمرا الى جايلها من عند لميا
هل تسعد عندما يمرر لك احدهم تاج؟
اه طبعا دانا حموت من الفرحة وكمان لما يكون التاج دا اول تاج ليا

هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟
كلهم حبايبى وانا ببقى مبسوط لو اى حد مررى تاج
هل تستمتع عند إجابتك عن أسئلة التاج
اه بحس كدة انى برسم الكلام
هل ترى للتاج أهمية حقيقية؟
تواصل وفرصة للتعرف على المدون بطريقة محورية(حلوة محورية دى)
هل فكرت في عمل تاج خاص لك من قبل؟
اه كتير بس التكلفة وكدة وكمان زمن السلاطين انتهى (وجه بيطلع لسانه على راى سمرا)

هل تفضل قراءة اجوبة التج عند المدونين الاخرين؟ أم لا تهتم سوى بالتدوينات الأخرى فقط؟
انا بقرى كله مبفوتش حاجة

عندما ترد على التاج ما الذي تراعيه اكثر؟
الصراحة وانى مكونش سمج عشان بكره السماجة

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
اه طبعا بحرص بس مش الاول لما ابقى امرر ،مش حتغير حاجة لا تقلق
هل تلتزم حرفيا بأسئلة التاج ؟
نعم حرفيا ومهنيا

ما هي نوعية التاجات التي تفضلها؟
كله على كله ولما تشوفوا قولوا

إلى من تحرص على تمرير التاج؟
والله كل الناس حتى الى ماشيين فى الشارع بس اخص بالتقدير الاخت محض روح،والاخت وشوشنى،والاخ مصر هى امى ،ووردة سودا،ومحمد ياسر،وايمن راسبوتين

تمرر التاج ده لمين؟
انظر الاجابة السابقة

امـــــــــى

اقف فى وسط الالعاب لا اعرف ماذا اختار لاجد اختى تجرى على لعبه الارجوحة (المرجيهة يعنى) اذهب لارى اذا كنت استطيع ان اركب معها لتقنعنى انها تركب وانا ادفعها ثم انا اركب وهى تدفعنى بالطبع لتستولى على الدور كله ولا املك غير انى اقول لها"والله مانا لاعب انتى بتلعبى لوحدك " لاتركها غاضباً وامر من امام الاطفال الاخرين الذين يلعبون نفس اللعبة......وفجاة....
تصطدم بى احد الارجوهات(قلنا المرجيهة يعنى) فى مقدمة راسى لاكتشف ان هناك دماء وانى قد جرحت من جراء الصدمة بالطبع لم يكن بوسعى لحظتها غير ان ابكى واجرى على امى التى تحتضننى وتقوم لتجرى بى الى مركز الاسعاف فى النادى لتصطدم بكل ما يقابلها من اشياء وتظل تبكى على بكائى حتى نصل الى العيادة ويطمئنها الدكتور انى بخير وان هذا مجرد جرح بسيط وسيقوم بعمل اللازم ...

تهدئ امى من روعها لتكتشف بعد ذلك ما اصابها هى من جراء ما كانت تصطدم به عندما كانت تحملنى وتجرى لترى اثار الكدمات

والخبطات والجروح التى لازمت علاجها اسابيع كاملة

هذا بالطبع ليس احد مشاهد الافلام بل هو واقع حدث لى ولا اعرف حقاً برغم اننى كنت صغيراً ذلك الحين الا اننى اتذكر هذه الواقعة واتذكر

نظرة امى التى كانت كمن طعن عندما رات الدماء تسيل من جبينى وكلما جرحت او نزف الدم منى اتذكر هذا المشهد جيداً

كم احبها وكم ساحبها
تلك المراة التى طالما كانت الحنان متمثل فى انسان، كانت تعطينى دائماً دون ان تسالنى، كم بكيت من اجلها وانا اراها تعانى فى الازمات وتحاول ان تخفى عنا حتى لا ينتقل الينا قلقها، لم اتخيل يوماً ان اعيش بدونها او ان ابعد عنها

اتمنى ان اصرخ للعالم اجمع واقول لهم هذه امى
امى هى البساطة بعينها.....ليست خبيرة تربية....انها مجرد ام وهذا يكفى

احب ضحكتها عندما اداعبها
واحب غضبها التى لا تعرف كيف تصتنعه ثم تنظر لى وتضحك فى النهاية

امى سامحينى اذا اخطات فى حقك فى يوم فانتى تعرفينى اكثر من نفسى

الام نعمة لا يقدرها الا من حرم منها فانتبهوا الى النعمة التى معاكم وتذكروا ما فعلت من اجلكم.

كل سنة وانتى بخير يا اجمل واحن ام فى الدنيا......

ذكريات

ذكريات

!....كل شئ فى حياتى يجعلنى اتذكر

.....كم حاول قلبى ان يثب من مكانه كما تنزع الشجرة من جذورها

....كم تمنيت ان يتوقف الزمن وتتجمد الاشياء حتى لا تكون هناك ذكريات

!!!....كم حاولت ان اهرب من التفكير لاجده يتربص بى فى كل وقت وحين

.....كم حاولت ان اكون بين الناس لاهرب من وحدتى لاجدنى اشد وحدة بينهم

.....كم بكيت واحساسى بالضياع من نفسى يزيد

.....كم شكيت وانا اعلم ان لا احد يفهم

......كم مررت بلحظات تنميت ان انفجر واضرب بكل شى عرض الحائط

.....كم يزيد خوفى وانا اعلم ان الحياة هى التى تقودنى ولست انا

!!!!.......كم هربت من الذكريات لاكتشف انها تنتظرنى فى النهاية ساخرة


بعض الخواطر التى كتبتها كما احسست بها دون محاولة لوضع تناسق او سجع بين الكلام واعذرونى لذلك ولكنى احببت ان انشرها كما هى.

لقاء الابداع

وكان اللقاء
كان اللقاء فى كافتريا الابداع فى الاوبرا وعشان كدة حبيت اسميه لقاء الابداع طبعا انا فى الاول قاعدت احضر ليوم اللقاء دا من ساعة ما عرفت، خلاص بقى حتكلم مع الناس الحلوة الى بيدونوا ،كنت اتفرجت انا على صور اللقاء السابق الى محضرتوش للاسف طبعا قررت انى اجيب معايا الكاميرا عشان اصور اللقاء الجبار وقاعدت اجهز واحضر فيها من باليل عشان ابقى مستعد ، روحت اللقاء بعديه بحوالى خمس دقايق لقيت الناس قاعدة ،انا اتخضيت فى الاول من العدد شوية مش عارف ليه ساعتها افتكرت كلمة علاء ولى الدين وهو بيقول "لف وارجع تانى" ، سلمت على الناس الى قاعدة كانت اول واحدة اتعرف عليها من الموجدين سمراء النيل واستقبلتنلى بابتسامة بشوشة اديتنى راحة نفسية وخلتينى افوق من الخضة الى كنت فيها قبلت بعد كدة ابراهيم وكنت طبعا شوفته قبل كدة فى حفلة فيروز كراوية بعد كدة شوفت ياسمين والى كانت فى قمة ناشطها وبصراحة صوتها اتنبح فى الكلام ....يا نهار اسود هو انا حاقعد احكى كل حاجة بالتفاصيل يبقى حكتب لحد بكرة.....المهم يا جماعة ان اللقاء عجبنى جدا رغم الزحمة واللخبطة الى كانت فيه اطرحت افكار كتيرة منها فكرة سمراء النيل لمساعدة الاطفال والمعاقين بالطرق المتاحة لكل انسان والى اتكلمت عنه فى مدونتها بالتفاصيل ،طبعا كان فى احداث اساسية فى اللقاء بالنسبة ليا انا منها لقائى بالانسان الجميل ايمن صاحب مدونة راسبوتين وهو حقيقى انسان اكثر من رائع وشرفنى انى اتعرفت عليه واتمنى تدوم صدقتنا وكلامى مع الاستاذ القدير حسنى سليمان، وانى طلعت عين ابراهيم بالكاميرا الى لله الحمد مصورتش حاجة وقررت انها تتوقف عن عملها من ساعة ما وصلت وحوارى مع سمراء النيل الانسانة الجميلة الى فعلا صعب تلاقى بنوتة طيبة للدرجة دى فى الزمن الى اهنا عايشين فيه وكلام ياسمين عن التدوين وفكرتها عن انشاء ما يجمع المدونين فى الواقع مثل رابطة او جمعية وطبعا لقائى بصديقى محمد ياسر الى مشى بدرى عشان الكلية بتاعته الى مطلعة عينه وكلام الاستاذ احمد شوقير الذى اثرى اللقاء بوجودة وطبعا كلامى مع كل من اصحاب المدونات الى كنت بدخل عليهم مثل هانى صاحب مدونة روبابيكا ودبور و ايجل وفيروزن لف الى كنت كل شوية بنساه واساله "انت صاحب مدونة اى؟" بصراحة انا اتبسط اوى فى اللقاء وكان من الايام الى حفتكرها عالطول لاسباب كتير منها عشان الناس الحلوة الى اتعرفت عليهم وعشان دا كان اول لقاء حقيقى بالمدونين وفى الاخر يا جماعة ابقوا قولوا لسمراء النيل متنساش السندوتشات وهى حتفهم واحب اسمع اغنية زحمة يا دنيا زحمة للشاعر احمد عدوية :)
الناس الحلوة الى كانوا موجودين
anooojy.blogspot.com
ssalah.blogspot.com
whiteseagull.blogspot.com
moorgen.blogspot.com
tota-tota.blogspot.com
looly-looly.blogspot.com
amdonia.blogspot.com
bikya.blogspot.com
10fthepeople.blogsome.com
misr-hya-omi.blogspot.com
a7ad.blogspot.com
hwahwa3.blogspot.com
mesharef.blogspot.com
waghtnazr.blogspot.com
newmido26.blogspot.com
oredoky-ontha.blogspot.com
meshmesh5000.blogspot.com
hosny45.blogspot.com
ahmedhelmasry.blogspot.com
thealien.blogspot.com
shidwik.blogspot.com
ramyemil.blogspot.com
cestmoi-nadine.blogspot.com
pinsywinsy.blogspot.com
astronomystar.blogspot.com
day-light.blogspot.com
anaweana.blogspot.com
yme1.blogspot.com
3yl-shaky.blogspot.com
yakooot.blogspot.com
ahmedabomosallem.blogspot.com
tona5000.blogspot.com
m-rashed.blogspot.com
dabbor.blogspot.com
mos3abof.blogspot.com
kelmetfagoumy.blogspot.com
lamiaamahmoad4810.blogspot.com
fromgrave.blogspot.com
shadytommy.blogspot.com
hadontamasrya.blogspot.com
hearttrainer.blogspot.com
bent-sa3d.blogspot.com
3mkelhyah.blogspot.com
amirahass.blogspot.com
ahmedfouadeldin.blogspot.com
bassama.blogspot.com
ayoubelmasry.blogspot.com
ihapology.blogspot.com
madarati.blogspot.com
just-amira.blogspot.com
strugglingmichealitoo.blogspot.com
tigress-diaries.blogspot.com
shokeir.blogspot.com
amyasser.blogspot.com
raspoutine1.blogspot.com
hoba28.blogspot.com

الدستور الكوميدى

كنت من فترة كدة وانا قاعد بشوف موقع وائل عباس وبتفرج على فيديوهات التعذيب قلت اشوف موقع لجريدة الدستور فتحت جوجل وكتبت الدستور طلعيلى نتائج كتيرة بس من ضمنها كان الدستور المصرى قلت القى كدة نظرة على الدستور واخد فكرة هما كل شوية يقولك تعديل الدستور تعديل الدستور المهم انا دخلت وابتديت اقرا فيه المواد، طبعا هو متقسم من جوه لابواب وكل باب فى فصول زى كتب المدرسة كدة ابتديت اقرى شوية شوية بس بصراحة ابتديت اضحك من الكلام الى المفروض انه دستور مصر الى هو النظام الى ماشية عليه مصر والى بيتعمل بيه فى القوانين وكدة وكان من ضمن المواد الى ضحكتنى اوى واحب اهديها لكل من وزارة الداخلية وحبيب العادلى

اولاً مادة(42): كل مواطن يقبض عليه أو يحبس أو تقيد حريته بأى قيد تجب معاملته بما يحفظ عليه كرامة الإنسان، ولا يجوز إيذائه بدنيا أو معنويا، كما لا يجوز حجزه أو حبسه فى غير الأماكن الخاضعة للقوانين الصادرة بتنظيم السجون. وكل قول يثبت أنه صدر من مواطن تحت وطئة شىء مما تقدم أو التهديد بشئ منه يهدر ولا يعود عليه

ثانياً مادة(47): حرية الرأى مكفولة، ولكل إنسان التعبير عن رأيه ونشره بالقول أو الكتابة أو التصوير أو غير ذلك من وسائل التعبير فى حدود القانون، والنقد الذاتى والنقد البناء ضمان لسلامة البناء الوطنى

طبعا انا كان تاثير المادتين دول عليا بعد ما كنت فى موقع وائل جامد اوى لدرجة انى مكونتش عارف هو الواحد المفروض يضحك ولا يعيط بس انا ضحكت من كتر الهبل الى بيحصل فى البلد ربنا يسترها معانا ولا يوقعنا تحت ايد واحد من ولاد الجزمة دول الى فاكرين ان البلد اتعملت ليهم بس وان الشعب المفروض ياخد على قفاه ويسكت .

دعوة للتدوين.....دعوة للحرية

كنت عالطول بدور على انى اعبر عن رايى صح-فى نظرى طبعا او غلط-فى نظر بعض الناس- المهم اعبر وخلاص واعلق على حاجات كتير باشوفها او باسمعها او بقراها ... دا كانت من اكتر الاسباب الى خلتنى افتح مدونة فى اول الامر كنت بقرأ على النت لناس كتير فى موضوعات مختلفة بس كلهم فى مجال معين لانهم كانوا بيبقوا مرتبطين بالموقع الى بيكتبوا فى لحد ما لقيت موقع كدة بتاع انسة سعودية اسمها نجوى كانت بدون من غير حتى ما تعرف اى هو التدوين وانا بعتلها شوية حاجات كنت كتبتها لما حصلت مواضيع زى الحرب على افغانستان والعراق وكان هدفى نتشارك الافكار وكمان الاقى حته انشر فيها بحرية شوية بعد كام شهر كدة سمعت محمود سعد وهو بيتكلم عن التدوين والمدونين وكان ساعتها جايب علاء وانا طبعا اتبسط اوى وساعتها ابتديت اقرى المدونات وكانت اول مدونة اقراها بنت مصرية وهى كمان الى قالت ازاى الواحد يعمل مدونة ساعتها قلت خلاص انا حاعمل مدونة لنفسى وفعلا عملت مدونة بس مكتبتش فيها حاجة عشان كنت باجل عالطول وكنت فاكر ان الواحد عشان يكتب فى المدونة لازم يكتب كلام بقى منمق وفصحى وكدة حتى اول المواضيع الى كنت بكتبها كانت فصحى مع انى كان بيطلع عينى عشان الاقى الفاظ مناسبة على الى عايز اقوله المهم فضلت كدة فترة لحد ما قررت انى الغيها وفعلا لغتها-كانت بنفس الاسم دا على فكرة- بس كل شوية كنت بتخنق اكتر وقررت انى اكتب تانى عشان مفيش حاجة فيها امل ولا تعليم الواحد عارف يتعلم فى صح ولا عيشة الواحد عارف يعشها صح ولا اكل ولا حتى هوا حتى عارف يتنفسه صح-القاهرة من اكتر المدن تلوث فى العالم- ولا حكومة نافعة ولا مجلس شعب نافع ولا شرطة بتحمى ولا حاجة بتتغير فقلت خلاص بقى الواحد يتمتع بالحاجة الوحيدة المفروض انها من حقة وهى الحرية...طبعا فى دولتنا الكريمة عشان تبقى حر حر مينفعش بس طبعا المدونة حتبقى حر حر يعنى فقررت انى اتمتع بحريتى دى وادون وابتديت ادون وابتديت اتعرف على المدونين وابتديت احضر احداث بيتقابل فيها المدونين يعنى من الاخر قررت انى ابقى حر بس للاسف حتى دى مسبوناش نتمتع بيها كلها -نكدوا عليا الله ينكد عليهم- قال اى الحكومة بتفكر فى وضع ميثاق للكتابة على المدونات وكمان جاى موضوع كريم-مش حتكلم غير فى الجزء الى باعترض عليه والى هو اهانة الريس- بكره يجى يقولك اهانة الحكومة وبعديها اهانة الشرطة وبعديها اهانة الشعب.حرام بقى حتى شوية الحرية عايزين تتطلعوا عنينا بيهم بصوا يا جدعان انا كتبت البوست دا عشان اقول لكل الناس الى بيدون خليك دون ولا يهمك اى الى حيحصل يعنى ماهى خربانة خربانة ولاى مش بيدون بقوله دون لانك كدة حتى حيبقى اسمك بتتمتع بحق من حقوقك الادمية شوية لحد ما نشوف اى الى حيحصل