Tuesday, June 19, 2007

كلام







اكتب


شوية كلام عايز اقوله يمكن يكون مش فى موضوع واحد ،يمكن كلام كل حاجة فى اتجاه

بس عايز اتكلم من غير ما احدد انا عايز اتكلم فى ايه
اتكلم شوية فى الحاجات الى بفكر فيها ، الى بحلم بيها ،الى بديقنى ، حتكلم وبس
**
بقي معظمنا بيحاول ينفى كل حاجة عن نفسه وينسبها للاخرين ، تلقينا بنتكلم عن كثرة الاقنعة والزيف فقط لننفيه عن انفسنا
**
دايما كنت بفكر واسال نفسى هو انا الى الحلم الى بحلمه دا بحلمه عشان نفسى ولا عشان الناس- يعنى اى - يعنى انا فعلا عايز كدة ولا عشان انا شايف ان الناس بتقول دا كويس بتمنى احققه
لقيت ان كتير مننا بيحلم بالنجاح مش من وجهة نظرهم هما لا من وجهه نظر الناس الى حوليهم
**
دايما كنت بحاول اكون انا زى مانا او بحاول اقترب من دا يعنى لما احب اتكلم اتكلم لما احب اسال اسال وكدة وبقول دايما ان الى عايز يحبنى يحبنى والى مش عايز مش حجرى وراه وكنت فاكر ان الناس كلها كدة
بس دا كان لفترة لحد ما ابتديت اشوف واتعامل مع ناس دايما كانت بتتكلم وتقول وتعمل كل حاجة مش فى نفسها او كل حاجة بعيدة عن شخصيتها تتكلم عن تفتحها وفهمها للامور واستوعبها لكل حاجة وتيجى تبص عليهم فى نفس الموقف الى بيتكلموا عليه بس فعليا تلقيهم حاجة تانية خالص ودا كله عشان بتبقى بتدور انها ترضى الناس بره فى الوقت الى بتتكلم فيه لكن هى بعيدة كل البعد عن دا .

مش عارف بس بيتهيئلى قالوا قبل كدة ان عمرك ما حتعرف انك ترضى كل الاطراف ومفيش حد اتفق عليه كل الناس طيب ما
تخلينا نفسنا احسن


-اعتقد اننا سنظل نلمع فى انفسنا حتى نفقد ذاتنا
**
بحب ام كلثوم - من وانا صغير وانا بحبها


تخيلوا انى كنت بسمعاها وانا صغير وكنت ساعات مبفهمش كل كلمها بس كنت بستمتع بيها جدا
كنت فى وقتها ناس بتتريق انى بسمع ام كلثوم -يعنى تخيلوا لما تبقى لسه فى ابتدائى وتكلم صحابك عن ام كلثوم - كنت دايما بقولهم انى بسمع بردة اغانى لعمرو دياب وكدة بس دا ماله ومال ام كلثوم
لما فكرت ليه بحب ام كلثوم لقيت انى كانت بدايتى معاها لما كنت بقعد جنب جدى فى البلكونة وهو بيسمعها ويقعد يكلمنى عنها وازاى كان الملوك بيجوا من كل البلاد عشان يسمعوها ويشرحلى ساعات الكلام الى بتغنيه
بس جدى كان بيكلمنى عن حاجات كتير وبيسمع ناس تانية اشمعنى حبيتها هى؟


**
كنت ايام المدرسة بنقضى وقتنا الفاضى فى حاجات كتير اساسا اهنا مكنش عندنا حاجة تانية غير اننا نلعب

يعنى شوية اتوبيس كومبليت على اكس او على بينجو بس كان فى لعبة كل لما افتكرها اقعد اضحك


اخترعناها ومش عارف كان فى حد فى مدارس تانية بيلعبها ولا لا


كان اسمها اقلام

كل واحد يحط قلمة على الديسك ونقعد نخبط الاقلام فى بعض كل واحد ليه لمسة واحدة والى يوقع قلم التانى الاول هو الى يكسب....نفسى اعرف جبناها منين دى؟

********

Monday, June 11, 2007

Need Answer...?




دائما ما ابحث عن الكلمات
فى تعاملى مع الناس وفى تعاملى مع نفسى
حتى وانا اتحدث الى نفسى اجدنى ابحث عن الكلمات المناسبة، ظننت كثيرا اننى مجنون فلا يفعل هذا الا المجانين فمن سيحاسبنى عن كلامى مع نفسى.



افكر واقدر واحسب كل كلمة قبل ان اقولها اؤمن ان عقلى هو كل ما املكه وهو كل ما استطيع ان احقق به احلامى
حب او عمل او صداقة او اى شى فى حياتى خاضع لمشاعرى وفى هذا تناقض مع ما كنت اقوله عن عقلى ،فانا احاول دائماً ان انمط الامور وان اضعها فى قالب بشكل معين.


ولكن غالبا ما تسيطر على عواطفى لاجد اننى لم افعل شيئا مما املاه على عقلى وتظل هذه الدائرة المفرغة
افكر واشعر وامشى وراء مشاعرى لاجد اننى اعود لعقلى بعد ان تضيعنى مشاعرى ثم اجد ان عقلى يقودنى لمشاعرى


لم افهم يوما كيف يستطيع بعض الناس ان يقدروا كل شى بعقلهم دون مشاعرهم وكيف عندما اتكلم مع شخص من المفترض ان له خبرة فى الحياة يكلمنى بشكل عقلانى جدا ولكنى لا احس به باى مصداقية
كانه يلقننى من كتاب الجبر من ايام المدرسة
"اذا قابلت فلان لتفعل كذا فهو يحب ذلك"
"احذر من هذة المراة فهى لا تحب غير نفسها"

وكان الناس كتاب مفتوح نستطيع ان نضعهم فى قوالب كاننا نبيع سلعة ونقول مواصفتها


ولكن اشك حقا ان هذا حقيقى فهناك دائما نسبة ولو بسيطة ان يغير الانسان كل شى فهو فى النهاية انسان
قد اكون مجنون بالفعل ولا اعرف ما هو هذا الشعور الذى اصفه ولكننى وجدت نفسى اكتب كما املى على عقلى
ام اقول احساسى.


لا اعرف ................؟

Friday, June 8, 2007

شوية تاجات بعد الامتحانات


عدنا بعد الامتحانات والحمد لله

انا كنت مقرر انزل شوية حاجات كدة بس قلت اعمل التاجات الى جتلى فى الاول عشان الناس الى بنحبهم وبعتولنا التاجات ميزعلوش مننا

الاول

تاج جالى من وشوشنى ومن روزا


نبدأ


أحب شخص لقلبك في الدنيا؟
هما ناس كتير بس عشان نبقى جوبنا اخص بالتقدير امى ثم ابى ثم امى تانى ثم واحدة كدة مش حتعرفوها فمش حقول اسمها
***
إنسان مستعد تضحي بحياتك - ركز فى كلمة حياتك - عشانه؟
عائلتى الكريمة ونفس الواحدة الى مش حتعرفوها فمش حقول اسمها
***
إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
هو مفيش حد كرهته للدرجة دى و لسه موصولتش لمرحلة القتل بس اول ما اوصل حتعرفوا لوحدكم بس انتوا تابعوا الجرايد
***
ما هو:اسم أجمل كتاب كتبه بشر قرأته ومحتفظ به حتى الان؟
هما كتابين او بالمعنى الادق روايتين او نقول رواية ومجموعة قصصية
اقول بقى وخلاص
"المقامر" لدوستويفسكى
"وتاهت بعد العمر الطويل" لاحسان عبد القدوس
***
اسم كتاب - كتبه بشر برضه - انت متعلق بيه وبتقرأه كل فترة؟
كتاب "رجال حول الرسول"
***
أهم جهاز منزلى أنت متعلق بيه أو بتستخدمه كتير؟
هو ليه التصميم على حاجة واحدة متقول اهم جهازين او تلاتة كدة خليك كريم
الاول طبعا الكمبيوتر
بس بردة بحب الخلاط اوى عشان بعمل كل شوية اختراع كدة فى العصاير
نفسى اخده فى حضنى لما اجى انام
***
شيء تحس بالراحة النفسية عندما تنظر إليه؟
الطفل النائم
***
مكان تحس فيه بالحنين الى شيء لا تدرى ماهو و ذكريات جارفة الى لاشيء؟
البحر ثم ابحر وبعده البحر
***
مكان تحس بالراحة عندما تدخله؟
المسجد
***
اجمل مدينة زرتها داخل مصر ؟
الاسكندرية
***
شخصية كارتونية بتحبها؟
بطوط
***
نوع هاتفك المحمول؟
نوع كدة غريب ودا بجد والله
لو حد خبير ممكن اجبهوله يقولى ل،احسن انا نفسى اعرف
***
سرعة بروسيسور جهازك؟
حلو وبيمشى
***
حجم ذاكرة -هارد- جهازك؟
والله هو عقله على قده
***
المساحة التى تشغلها المواد الاسلامية على جهازك؟
يعنى شوية كدة ربنا يزيد ويبارك
***
نفس المساحة السالف ذكرها فى قلبك -الإجابة لنفسك عشان الرياء يا اخواننا -؟
ما قولنا الاجابة لنفسى.....بتقروا ايه؟
***
أهم هدف انت واضعه لحياتك الآن؟
النجاح بس باشكال مختلفة وحاجات مختلفة لو قاعدت ارغى مش حنخلص كفاية عليكوا كدة
***
مواصفات فتى \فتاة الأحلام بالنسبة لك؟
بتعيش وبتستحمل ويكون معاها ضمان
***
صف ما يأتى:شعورك لما بتسمع كلمة مصر ؟
مصر صفر المونديال ، مصر غرق العبارة، مصر تعذيب المواطنين ، مصر تزوير الانتخابات ، مصر مبارك
انهى مصر فيهم؟
***
شعورك لما بتسمع كلام عن اليهود؟
بالقرف
***
شعورك لما بتشوف ظابط شرطة؟
ببقى عايز اروح اديله على قفاه واطلع اجرى
***
شعورك لما بتشوف الكناس العجوز فى الطريق؟
بيبقى صعبان عليا ونفسى اروح اتكلم معاه واساله لو عايز حاجة اقدر اعملهالو
***
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
عادى واحد وهو حر
تقريبا مبجليش تفكير معين لانى بتعامل معاه زى اى حد ، عادى يعنى
***
إحساس يراودك فى إشارة مرور مغلقة بسبب مسئول كبير؟
ممكن انام واقول للسواق صاحينى لما نوصل
******
احب امرر التاج دا لمين؟
خليه عندى انا بقى كفاية كدة مش حديه لحد

*********

التاج التانى جالى من ابراهيم حبيب قلبى

انا شبه مين من القادة؟

عملت الاختبار وطلعت شبه جيفارا










بس انا عمرى ما حبيت انى اكون القائد دايما كنت بختار لنفسى دور الرجل الثانى الذى يحرك كل شئ من خلف الستار

فزى ما انتوا عارفين القادة دايما لاما بيتنشوا لاما بينتحروا




***********


انا شبه مين من ابطال friends






طلعت شبه تشاندر















طلعت فى الاخر شبه الاخ تشاندر والله كويس




**********

انا شبه مين من الافلام الكلاسيكية؟




طلعت شبه الفيلم دا بس انا معرفوش للاسف
بس انا اكيد حبقى الايد الصغيرة مش الكبيرة
احب امرر التاج لمين
والله الى يحب يعمله يعمله
والاختبارات هنا وهنا وهنا
بس احب امرره بردة عشان ميبقاش كل حاجة لا لا
روزا
محض روح
وشوشنى
مايكل
فاطمة توتة
وريرى